Kjo veprimtari praktike synon të lidhë njohuritë teorike për ligjin me situata reale nga jeta e përditshme.
Klasa ndahet në grupe të vogla dhe secilit grup i jepet një situatë konkrete nga përditshmëria: shkelja e rregullave të qarkullimit rrugor, mosrespektimi i detyrimit ushqimor për fëmijët, hedhja e mbeturinave në vende publike, mosrespektimi i orarit të punës dhe bullizmi në shkollë ose në rrjete sociale.
Me ndihmën e tabelave të mëposhtme, nxënësit analizojnë situatën duke diskutuar se cilat rregulla shoqërore përfshihen, cili ligj e rregullon atë dhe çfarë pasojash sjell zbatimi ose moszbatimi i ligjit për individin dhe për shoqërinë.
Më pas grupet përgatitin një prezantim të shkurtër (fjalim, poster ose lojë me role), ku shpjegojnë pse ligji është i domosdoshëm në atë rast dhe çfarë roli ka qytetari në respektimin e tij.
Veprimtaria përmbyllet me një diskutim në klasë, ku nxënësit reflektojnë për përgjegjësinë individuale dhe për rëndësinë e zbatimit të ligjit për një shoqëri funksionale dhe në harmoni.